كتێـــب

وه‌رز زستان بوو، شه‌و داهاتبوو، ئه‌ندامانی بنه‌ماله‌كه هه‌موویان پاش نوێژی شێوان بۆ شه‌وچه‌ره دانیشتبوون.

باوک وتی: باشترین خوو و ڕه‌وشت كه ‌له‌ باپیرتانه‌وه فێر بووم ئه‌وه‌یه ئیش ‌و كار له وه‌ختی خۆیدا جێبه‌جی‌‌ بكرێت، باپیرتان پێی ئه‌‌وتم: ڕۆڵه‌، كاری ئه‌مڕۆ مه‌خه‌ره‌وه سبه‌ینێ چونكه‌ ئه‌و كارانه به‌سه‌رته‌وه كۆ ده‌بنه‌وه ‌و ئیتر بۆت ته‌واو ناكرێن.

سیروان وتی: بابه گیان منیش ئه‌و ڕه‌وشته له‌ تۆ فێر بووم، بۆیه‌ كاروباری قوتابخانه دوا نا‌خه‌م و له كاتی خۆیدا ڕایده‌په‌ڕێنم.

نازدار وتی: من كاتی خۆم له نێوان ڕاپه‌ڕاندنی كاروباری قوتابخانه ‌و خوێندنی سه‌ربه‌خۆدا دابه‌ش كردووه.

باوك ده‌ستی به‌ سه‌ری كچه‌كه‌یدا هێناو پێی وت: به خوێندنه‌وه‌ی یه‌ك ساعه‌ت له‌و كتێبه‌ی كه‌ به‌ دڵته‌ ڕۆشه‌نبیری ‌و زانینت په‌‌ره ده‌ستێنێت.

نازدار وتی: له‌به‌ر ئه‌مه من كتێبی زانستی‌ و چیرۆكی به‌كه‌ڵك ده‌خوێنمه‌وه‌ و زۆر ئاگاداری كتێبه‌مانم ده‌كه‌م.

باوك وتی: نازدار چۆن ئاگاداری كتێبه‌كانت ده‌كه‌یت؟

نازدار وتی: كه‌ كتێبێک ده‌خوێنمه‌وه بۆ ئه‌وه‌ی بزانم گه‌یشتومه‌ته كوێ قه‌ڵه‌م ناخه‌مه ناو لاپه‌ڕه‌كانییه‌وه‌ و سووچی لاپه‌ڕه‌كانیشی نانووشتێنمه‌وه.

باووک وتی: چاك ده‌كه‌یت نازدار. ئه‌ی تۆ سیروان چۆن ئاگاداری كتێبه‌كانت ده‌كه‌ی؟

سیروان گووتی: بابه: له كاتی خوێندنه‌وه‌دا خواردن ناخۆم نه‌وه‌كو كتێبه‌كه‌م چه‌ور بێت، ئه‌گه‌ر ده‌ستم پاك نه‌بێت یاوه‌كو ته‌ڕ بێت ئه‌وا ئه‌نگووست ناده‌م له‌كتێبه‌كه‌م‌ و هیچیشیان له‌سه‌ر نانووسم.

نازدار وتی: منیش كتێبه‌كانم ناخه‌مه سه‌ر زه‌وی ‌و له‌سه‌ر مێزی نانخواردنیان دانانێم ‌و به‌ ئه‌مووسته‌كه‌ڵه‌ی ته‌ڕ لاپه‌ڕه‌كانی هه‌ڵ ناده‌مه‌وه.

باوك وتی: شانازی به‌ هه‌ردووكتانه‌وه ده‌كه‌م ‌و پاداشتان به‌وه‌ ده‌ده‌مه‌وه كه كتێبخانه‌یه‌كی خنجیلانه‌تان بۆ ده‌كڕم بۆ ئه‌وه‌ی كتێبه‌كانتان نه‌درێن‌و ون نه‌بن.

---

• لێكدانه‌وه‌ی وشه‌كان:

• شه‌وچه‌ره: به‌شه‌و دانیشتن بۆ ڕبواردن ‌و گفت‌وگۆ كردن، چڵه‌ی شه‌وێ که بریتیه‌ له گوێز، خورما، میوژ و هتد.

• ده‌ستی‌ به‌ سه‌ری دا هێنا: دڵنه‌وایی كرد.

• خوێندنی سه‌ربه‌خۆ: خوێندنی ئه‌و كتێبانه‌ی كه له قوتابخانه ناخوێندرێن.

• ئه‌مووسته‌كه‌ڵه: ئه‌مووسته گه‌وره‌ی ده‌ست.